හොරෙන් විදුලිය අරන් අවසන් ගමන්යති

2015-09-13 ප.ව. 7.54

නීති විරෝධී ලෙස තෙකලා විදුලි රැහැන්පද්ධතියට දුරකථන රැහැන් යොදා සිය නිවසට විදුලිය ලබා ගැනීමට තැත් කළ පුද්ගලයෙකු අද (13වන දින) පෙරවරුවේ විදුලි සැර වැදීමෙන් මිදුලේම වැටී මියගොස් ඇත.මෙසේ මිය ගොස් ඇත්තේ ගිරාඳුරුකෝට්ටේ,විරනගම මහවැලි ගම්මානයේ අංක 16 දරණ නිවසේ පදිංචිව සිටි ඩී.එම්.අබේකෝන් බණ්ඩා නොහොත් බේබි අයියා නමැති 56 හැවිරිදි මහවැලි අධිකාරියේ සේවය කොට විශ්‍රාම ලැබූ තිදරුපියෙකි .

සිදුවීම වූ 13දිනයේ පෙරවරු 10ත් 12 අතර කාළයේදී මෙම අනතුර සිදුවන්නට ඇතැයි ප්‍රදේශවාසීහු පවසති.

මීට මසකට පමණ පෙර බිල්පත් නොගෙවීම නිසා මෙම මරණකරුගේ නිවසේ විදුලිය විසන්ධිකර ඇත.එතැන් පටන් ඔහු විටින් වට මෙලෙස සිය නිවසට විදුලිය ලබා ගන්නට ඇතැයි සැක කෙරෙන අතර විදුලි මනුවෙන් විසන්ධිකර තිබුණද සේවා රැහැන ඉවත් කර නොමැත.දුරකථන රැහැන් නිවසේ විදුලි පේනුවකට සම්බන්ධකර ඇති අතර එක් රැහැනක් නිවස අසල මාර්ගයේ ප්‍රධාන විදුලි රැහැනක් මත එල්ලා අනෙක සම්බන්ධ කිරීමට උත්සාහ ගන්නාවිට මෙලෙස විදුලි සැර වදින්නට ඇතැයි ගම්වාසීහු පවසති.

 කෙසේ වෙතත් විදුලි සැර වැදී නොබෝ වේලාවකදී ඔහු මියයන්නට ඇත.පොළිස් හදිසි ඇමතුම් 119ට ලද තොරතුරකට අනුව පොළීසිය එම ස්ථානයට ගොස් ඇත.

 මියගිය අයගේ බිරිඳ විදෙස් ගතව සිටින අතර බාල දියණිය නිවසේ තනිව සිටීමට නොහැකි නිසා අසල පිහිටි සිය සොහොයුරාගේ නිවසේ වාසය කරන්නීය.

මරණකරුගේ දියණිය වන ඩී.එම්.හිමායා සඳමිණි මෙනවිය මෙසේ පැවසුවාය.මිය ගිහින් ඉන්නේ මගේ තාත්තා. අම්මා රට ගිහින් ඉන්නේ.තාත්තා කළින් මහවැලියේ වැඩකළා.වන්දි අරන් අයින් වෙලා හිටියේ.මට ගෙදර තනියෙන් ඉන්න බැරි නිසා මම ඉන්නේ අයියාගේ ගෙදර. මීට මාසෙකට විතර ඉස්සෙල්ලා අපේ ලයිට් කැපුවේ බිල් ගෙවලා නැති නිසා.ඒත් තාත්තා මෙහෙම දෙයක් කරන බව මම දැනගෙන හිටියේ නැහැ.

අයියාලාගේ ගෙවල් ළඟ කට්ටියකගේ ලොයම් කපනවා අයියා මට කිව්වා අපේ ගෙදරින් දෑකැත්තක් ගේන්න කියලා. දවල් ගෙදරට ආවේ දෑකැත්තක් ගෙනියන්න. එතකොට මම දැක්කා තාත්තා වැටිලා ඉන්නවා.බිම වයර් එකක් තිබුණා මම දුවලා ගිහින් අයියාට කිව්වා. අයියා ඇවිත් කට්ටියට අඬගැහැව්වා ඒ වෙනකොටත් ඔක්කොම වෙලා ඉවරයි යනුවෙන් ඇහඬමින්  පැවසුවාය.

 මරණය පිළිබඳ මහේස්ත්‍රාත් පරීක්ෂණය මහියංගණ වැඩ බලන මහේස්ත්‍රාත් ගාමිණි පී. රඹකැන්පුර මහතා විසින් පවත්වනු ලැබූ අතර පශ්චාත් මරණ පරීක්ෂණය සඳහා ගිරාඳුරුකෝට්ටේ දිසා රෝහලේ දිසා වෛද්‍යවරයා වෙත යොමු කරන ලෙස නියෝග කළේය.

ගිරුඳුරුකෝට්ටේ පොළීසියේ ස්ථානාධිපති පොළිස් පරීක්ෂක මොහාන් ද සිල්වා මහතාගේ උපදෙස් මත පො.සැ.24978 සුදුසිංහ,පො.සැ.20016 නන්දසේන,පො.කො.45985 සෝමපාල,පො.කො.70969 ජානක,පො.කො.50666 පුෂ්පකුමාර යන නිළධාරීහු පරීක්ෂණ පැවැත්වූහ.