මහියංගනය අවට තරුණ තරුණියන්ට අලුත් ලෝකයකට දොරගුළු විවර වුණා18 වංගුව නව මාර්ගය විවෘත කරමින් ජනපති මහින්ද රාජපක්‍ෂ කියයි
උඩුදුම්බර - ඇස්‌. අබ්දුල් අසීස්‌...
මහනුවර මහියංගනය 18 වංගුව නව මාවත සංවර්ධනය කිරීම මෙම පළාත්වල ජනතාව ලබන විශාල ජයග්‍රහණයක්‌ බවත් මහියංගනය තරුණ තරුණියන්ට මේ මාර්ගය ගොඩනැඟීම තුළින් අලුත් ලෝකයකට දොර විවෘත වන බවත් ජනාධිපති මහින්ද රාජපක්‍ෂ මහතා පැවසීය.ජනාධිපතිවරයා මේ බව පැවසුවේ රුපියල් මිලියන 5200 ක වියදමින් සංවර්ධනය කළ 18 වංගුව නව මාවත ජනතා අයිතියට පත් කිරීමෙන් අනතුරුව උඩුදුම්බර මහා විද්‍යාලයේ පැවැති ජනහමුව අමතමිනි.17 වන වංගුව අසලදී පීත්ත පටිය කපමින් මාර්ගය විවෘත කළ ජනාධිපතිවරයා සිය රථය 18 වංගුව නව මාවතේ තනිවම පදවමින් මෙම නව මාර්ගයේ රථයක්‌ පැදවීමේ අත්දැකීම විඳ ගත්තේය. මෙහිදී හසලක ගුරුළුපොත ප්‍රාථමික විද්‍යාලයේ සිසු දරු දැරියෝ සිංහ කොඩි ළෙලවමින් ජනාධිපතිවරයා පිළිගනු ලැබූහ.නුවර මහියංගන පාර එහෙමත් නැතිනම් දහඅට වංගුව පාර විවෘත කරලා ඒ නවීකරණය කළ පාරේ කිලෝමීටර විස්‌සක්‌ විතර ගිහින් තමයි මම තමුන්නාන්සේලා අමතන්නේ. මේ ස්‌ථානයට එන විට මට මතක්‌ වුණේ වසර සියයක්‌ පුරා අපේ රටේ මිනිස්‌සු මේ පාරේ ආව ගිය හැටියි.ඒ කාලේ දහඅට වංගු මතක්‌ වෙනකොට අපේ රියදුරන්ගේ ඇඟ සීතල වෙනවා. මීටර හත අටකට වඩා පාර පළල නෑ. වාහන දෙකක්‌ මාරු වෙනකොට රිවර්ස්‌ කර කර අඩ තිය තියා තමයි ගමන ගියේ. 1815 ඉංගී්‍රසින් ලංකාව යටත් කරගත්තාට පස්‌සේ තෝමස්‌ හෙන්රි කියන සුද්දා අක්‌කර තුන්සියයක්‌ විතර අරගෙන කෝපි වගාවක්‌ ආරම්භ කළා. සුද්දන්ගේ වුවමනාවට තමයි එදා මේ පාර ආරම්භ කළේ.සුද්දන්ගෙ කාලේ මේ පාර හැදුවත් අපේ ලාංකිකයන්ටත් මේ පාර බොහොම ප්‍රායෝජනවත් වුණා. නැගෙනහිර පළාතේ ඉඳන් නුවරට ලුණු ගෙනාවේත්, මහියංගනේ වැදි ජනතාව දළ¹ හාමුදුරුවන්ට මී පැණි ගෙනිච්ෙච්ත් බෞද්ධයො වන්දනාවේ ගියේත් මේ පාරේ. පසුගිය කාලෙ වෙනකොට දවසට වාහන දාහක්‌ දෙදාහක්‌ මේ පාරෙන් එහා මෙහා ගියා. වෙසක්‌ පෝය දවසේ සම්බුද්ධත්ව ජයන්ති වසර නිමා කරන අද දවසේ ඔබට මතක්‌ කරන්න කාරණයක්‌ තියෙනවා. මේ පාරෙ එක පැත්තක දළ¹ වහන්සේ වැඩ සිටින නගරයයි. අනෙක්‌ කෙළවරේ තියෙන්නේ බුදුහාමුදුරුවො වැඩම කරපු මහියංගනය. බොහොම වැදගත් නගර දෙකක්‌ සම්බන්ධ කර මෙම පාර කෝපි කාලෙ විදිහටම තිබුණා. කොළඹ පාරවල් මංතීරු හය හත වෙනකොට සුපිරි පාරවල් හැදෙනකොට මේ පාරවල් ගැන කවුරුවත් හිතුවේ නෑ. මේ පාරෙන් වැඩිම කොටස අයිති වෙන්නේ උඩුදුම්බරටයි.නගරයේ ඉපදිලා නගරයේ අධ්‍යාපනය ලබලා නගරයට යන්න හිටපු නායකයින් පිරිසක්‌ අපට හිටියේ. ඒ තත්ත්වය අද වෙනස්‌ වෙලා. ඒකයි ගමකින් මිනිහෙක්‌ උඩට ආවම තියෙන ප්‍රයෝජනය. අද අපේ රට මේ තත්ත්වයට ගෙනෙන්න එදා දහඅට වංගුවේ යන තරම්ම අමාරු වුණා. අද නම් බොහොම ලේසියෙන් ආවා. එදා එච්චර ලේසි නැහැ. හැබැයි රට ගෙනියන්නත් එහෙම තමයි. ඒක පාර හදලා පාරේ එනවා වගේ ලේසි නැහැ කියලා තමයි මට දැන් තේරෙන්නේ. හැබැයි අපි ඉදිරියට ආවා මිසක්‌ රිවර්ස්‌ කළේ නෑ. අඩ තිබ්බෙත් නෑ. අපි දේශපාලනයේදීත් ගමේ ඉඳලා ආවා වගේ දහඅට වංගුවම ගන්න ඉගෙන ගෙන තියෙන නිසා තමයි අපට මේ වාගේ යෝධ කාර්යයන් කරන්න ශක්‌තිය ලැබුණේ.මේ පාර ගොඩනැඟීම අනාගතයේ මේ පළාත්වල ජනතාව ලබන විශාල ජයග්‍රහණයක්‌ වෙන බව මම විශ්වාස කරනවා. මේ ගම්වලට මේ ගම්වල තරුණයින්ට මහියංගනේ තරුණයින්ට අලුත් ලෝකයක දොර ඇරෙනවා. ජනතාවට අලුත් ලෝකයක දොර විවෘත කර දෙනවා.මිත්‍රවරුනි,මේ වාගේ පාරවල් හැදුවහම රටේ ජනතාවගේ කාලය විශේෂයෙන් ජීවිත කාලය ඉතුරු වෙනවා. ඒ වගේම අපේ මහියංගන තරුණ තරුණියන්ට අලුත් ලෝකයක්‌ බිහි වුණා කියලයි මම හිතන්නේ. රට සංවර්ධනය වන්නේ වේගයෙන්. කොළඹ ඉඳන් ගාල්ලට පැයකින් යනකොට කොළඹ ඉඳන් අනුරාධපුරයට පැය තුනකින් යනකොට එදා පැය තුන හතරක්‌ තිස්‌සේ ගිය නුවර මහියංගනය ගමන පැය එකහමාරකින් යනකොට මහමඟට ගෙවුණ කාලය ඉතුරු වෙලා ජීවිත කාලය ඉතුරු වෙනවා. අවදානමත් අවම වෙනවා.ඒක හරියට ජනතාවගේ ආයුෂ වැඩි කරනවා වාගේ ආයු වඩ්ඩකෝ, බල වඩ්ඩකෝ, සුඛ වඩ්ඩකෝ, වර්ණ වඩ්ඩකෝ කියලයි බෞද්ධ අපි ප්‍රාර්ථනා කරන්නේ. අපිටත් ඕනෑ ඒකයි. ජනතාවගේ ආයු වර්ණ සැප බල වර්ධනය කරන්නයි අපිට ඕනෑ. යුද්ධය නතර කරලා පාරවල් හදලා රැකීරක්‍ෂා සුලබ කරලා ගොවිතැනට ආධාර දීලා දිවි නැඟුම ආරම්භ කරලා අපි කරන්නේ ඒකයි. මේවායින් තමයි ජනතාවගේ ආයුෂ වර්ණ සැප බල වර්ධනය වෙන්නේ. කොළඹටත් උඩුදුම්බරටත් එක සමානව සලකන කොළඹ දරුවොත් ඔබේ දරුවොත් සමාන අයිතීන් භුක්‌ති විඳිනවා බලන්නයි අපි මේ සියලු දේ කරන්නේ. ඒ පිළිබඳව ඔබටත් අයිතියක්‌ තියෙනවා.අතීතයේ මඟ හැරුණ දේවල් පවා සම්පූර්ණ කරගෙන යන නිසා අපේ සංවර්ධනය වේගවත් එකක්‌. දැන් තියෙන්නේ සංවර්ධන ගමනක්‌ නොවෙයි දියුණුවේ පිම්මක්‌ පනින එකයි. ඒත් අපි ඒක කරන්නේ මේ රටේ ජාතියේ ආගමේ සදාචාරයන් රැකගෙන බව කියන්න ඕනෑ. අපි අපේ ඓතිහාසික උරුමය රැකගෙන වැඩ කරන බවත් කියන්න ඕනෑ. සදාචාරය සිහිපත් වෙනකොට මට මේ මොහොතේ මතක්‌ වෙනවා මේ දහඅට වංගුව පාර හදන්න සුද්දො නියම කළ කාලේ අපේ මේ ප්‍රදේශවල සිංහල නායකයො වැඩ කළ හැටි.සුද්දො නුවර ඉඳන් මහියංගනයට පාර හදන්න තීරණය කරලා ගම්පහ බස්‌නාහිර කෝරළේ, ගම්පහ නැගෙනහිර කෝරළේ, ගම් දෙක කෝරළේ සහ කන්ද පහළ කෝරළේ ගම් ප්‍රධානීන් හතර දෙනා කැඳවලා රැස්‌වීමක්‌ තිබ්බලු. එදා හිටපු සුද්දන්ගෙන් ගමේ දුවලාව රැකගන්න ඕනෑ නිසා තමන් පදිංචි ගම්බිම් මග ඇරලා මේ වාගේ කඳු අතරින් පාර කපන්න සැලසුම් කරලා දුන්නාලු. මේ එදා තිබුණ තත්ත්වය නිසා ගත්ත තීන්දුවක්‌ වුණත් මේ කතාවෙන් කියවෙන්නේ මොන සංවර්ධනය ආවත් අපේ සදාචාරය අපේ උරුමය විනාශ වෙන්න දෙන්න බෑ කියන එකයි.අපිත් එහෙමයි. මොන තරමට රට සංවර්ධනය කළත් රටේ සදාචාරය රටේ උරුමය රැකගෙන තමයි ඒ දේ කරන්නේ.අපේ උරුමය උදුරා ගන්නවත් රට පාවා දෙන්නවත් රට විකුණන්නවත් බෑ. අපේ අනාගත පරපුර සදාචාරයට සංස්‌කෘතික උරුමයට හානි නොවෙන විදිහට තමයි රට සංවර්ධනය කරන්නේ. දළ¹ හාමුදුරුවොත් මහියංගන පුද බිමත් අතර ඉන්නා ජනතාවත් එහෙම හිතන්න ඕනෑ බව මම මේ වෙසක්‌ දිනයේ ප්‍රාර්ථනා කරනවා.ඔබට සුබ වෙසක්‌ මංගල්‍යයක්‌ වේවා·මෙම අවස්‌ථාවට අමාත්‍යවරුන් වන මහින්දානන්ද අලුත්ගමගේ, නන්දිමිත්‍ර ඒකනායක, නිර්මල කොතලාවල, පාර්ලිමේන්තු මන්ත්‍රී ලොහාන් රත්වත්තේ, මධ්‍යම පළාත් ප්‍රධාන අමාත්‍ය සරත් ඒකනායක යන මහත්වරුන් ද ආසියානු සංවර්ධන බැංකුවේ ශ්‍රී ලංකා නිත්‍ය අධ්‍යක්‍ෂ රීටා ඔසුල්ලිවාන් (Reeta Osullivan) මහත්මිය. මෙම මාර්ගයේ ඉදිකිරීම් කටයුතු සිදු කළ කොරියානු සමාගම වන කියන් නැමි සමාගමේ නේවාසික අධ්‍යක්‍ෂ කිම් ඩූ හී (Kim Do Hee), අග්‍රාමාත්‍ය ලේකම් එස්‌. අමරසේකර, වරාය හා මහා මාර්ග අමාත්‍යාංශයේ ලේකම් ආර්. ඩබ්ලිව්. ආර්. ප්‍රේමසිරි යන මහත්වරුන් ඇතුළු පිරිසක්‌ එක්‌ව සිටියහ
http://www.divaina.com/2012/05/07/news22.html
No comments:
Post a Comment